Een paar junge Lüüt in`n Bus weern recht so mööd und hebbt sik bit Lübek nie nich vun uns bit slapen ünnerbreken laaten. Ok nich as de Festutschuß mit`n Buddel Kööm rüm güng. Magt ja ok nix, wi hebbt geern vör ehr een mit drunken. Ünnerwegs hebbt wi nuch Tied hat, de Landschop vun “Schleswig Holstein“ to beluurn. Und wi sünd uns eenig, Holsteen is schön. Dat hett uns Herrgott fein trechkregen as he de Welt magt hett. Wi harn uns all tohoop mennig to vertellen und so weern wi verbaast in Lübek an`n Haben ankam. Mit den Busfahrer vörrut sünd wi all op Schip gahn.

Und dar harn wi dat Malör. De Käptein seggt uns recht so hardlig Moin, moin und den sall dat losgahn. Doch wat is dat?   De Pier hangt ja noch an`t Schip!   De Matros hett den Tampen achtern ni los magt!   Wat weer di dat een Höög.   Vörbi an een paar ohle Scheep geiht dat dürch den Lübecker Haben rut op de Trave. De Kaptein is darbi uns Fremdenführer, he vertellt uns veel över Lübek, den Haben und all de ohlen Hüüs an Land. Bi`n Buddel Beer und een Tass Koffee hebbt wi uns dat düssen morgen recht so good gahn laten. Robert hett den noch siin Schifferklavier rut halt und wi weern all tohoop an`t tirilieren as dull. Buten, op Achterdeck, dar weern de “Naturliebhaber“. Den wi fahrt all ne ganze Tied an een “Naturschutzgebiet“ vörbi. Dar gift dat veel to sehn. De een oder anner hett`n Feernkieker mit üm all de Vagels to beluurn. Se weern reinweg ut de Tüüt as se`n Seeadler an`n Heaven vör ehr Glöös kregen harn. Wi fahrt nu över den “Dassower See“, de is man blots dree Meter deep, na Dassow. Vörbi an Fischreusen geiht dat in den lütten Haben an Land. Bevör wi uns in`n Bus setten doot, müss de een oder anner sik noch rökert Aal ut de Fischbuud an`n Haben köpen.

Wi nehmt nu över Koopsteenploster und lüütje Straaten Kurs na Boltenhagen. Vörbi an grode Kornfelder und meern mag dürch schöne Alleen kamt wi tiedig in Boltenhagen an. Uns Ernst August magt nu een “Stadtrundfahrt“ mit uns. Dat wat he as Fremdenführer uns so alln`s vertellt kunn wi meis ni so recht glöven. Aver wi harn veel Spot darbi. Im Hotel “John Brinckmann“ hebbt wi Middag eeten. Dar kunns di vun twee Menüs een utsöken. Dat eene weer`n “Mecklenburger Rollbraten“ und dat annere weer`n “Regenbogenforelle“. Alleen de Vörsupp all, wat hett de fein smekt. Wi hebbt de Wirtslüüt den ok glieks fragt ob wi wat dar vun mit na Huus mitnehm dörvt, inne “Tupperschöttel“ versteiht sik. De Deern hett man blots smuzelt. De Rollbraten und de Fisch hebbt jüst so good as de Nadisch smekt. Düsse Wirtschap hett de Festutschuß good utsöcht. Wi harn all tohoop meis`n beten to veel eeten. An de Toonbank hett den de een oder anner ok noch op`n Weg na buten `n lütten Köm hat. To Verdaung versteiht sik!

Wi sünd nu all in Boltenhagen an`e Promenade lang flanert. Jed een kunn doon wat he wull. Eenerlei op he an`n Strand, op de Mole oder in`e Stadt bit inköpen sik de Fööt verpedden wull. Eene ganz besünnere Ehre ist dat vör uns ween, dat uns “Majestät Volker der Bodenständige“ düsse Tuur na Boltenhagen mit de Sänger ut Kremp mitmagt hett. Zeigt sik Majestät doch op düssen Weg recht so “volksnah“. Op`n neesten Dünnerstag will he den ok glieks bi`n Öbungsavend Klook acht in de ohle Realschool an Burggraven `n lütten ut de Buddel utgeven. Nadem de een sik de Fööt in de Ostsee wuschen hett, de anner ´n Tass Koffee drunken oder `n Iis eeten hett, sünd wi wedder trüch fahrt.

All weern wi mit `n lüttje Grientje in Bus instegen. Alln`s hett good passt. Dat Wedder wär schön, dat Programm weer good, dat Middageeten hett fein smekt und de Bus wär jümmer rechtiedig to stell. Ik möch op düssen Weg den Festutschuß, den 1. Bass vun de “Kremper Liedertafel Lied Hoch e.V.“, recht hardligen Dank seggen vör de ganze Möög de se sik magt hebbt. Besünners uns Ernst August, den Böverst vun`n Festutschuß.

Am End vun de Tuur na Boltenhagen hebbt wi uns mit`n paar Lüüt den noch op de Füürwach in Kremp abends Klook söven ne Grillwuss und een oder twee Beer afhalt. Und so güng düsse wunnerbare Dag ganz liesen to End.

 

Uwe Schuldt